СТАНДАРД life
АНАЛИЗИ

Видео игрите ја заменија музиката како најважен аспект на младинската култура

Би било погрешно да се каже дека видео игрите станаа широко распространети во 2020 година. Тие се широко распространети со децении, пишува „Гардијан“. Но, нивното место во поп-културата игра поважна улога и за гејмерите и за не-гејмерите од кога било досега. Ова делумно се должи на сите откажани настани во текот на изминатата година поради пандемијата Ковид-19. Музичкиот фестивал „Coachella“, на пример, не се одржа, но видео играта „Animal Crossing“ беше достапна за широка публика.

Коментарот на Шон Монахан за Гардијан потсетува дека дури и политичарите ја искористија видео играта за да ја убедат помладата публика да гласа на минатогодишните претседателски избори – Александрија Окасио-Кортес играше „Among Us“ со претставникот Илхан Омар од Минесота, а стримингот за време на играта го следеа над 430 000 луѓе.

„Долгогодишната традиција на постари политичари кои се обидуваат да изгледаат млади и модерни преку своите музички вкусови е заменета со постари политичари кои се обидуваат да изгледаат млади додека прават стриминг како играат видео игра“, напиша Монахан.

Но, тој рече дека пандемијата Ковид-19 не е причина за бум на видео игрите, туку само ги забрзува процесите што ја водат индустријата. Долго пред „локдауните“, видеоигрите триумфираа како најпопуларна форма на забава кај младите.

Кога пред неколку години, компанијата, која се занимава со проучување на потрошувачките навики, Morning Consult објави дека контроверзната YouTube ѕвезда PewDiePie го доби истото признание како светски познатиот кошаркар Леброн Џејмс меѓу американските момчиња од т.н. Генерација Z (родена помеѓу 1996 и 2009 година), ова беше ударна вест.

Кој е PewDiePie?! Ова ја зачуди Генерацијата Y (родени помеѓу 1980 и 1995 година), при што Монахан објасни дека тој е шведски блогер, кој прави рецензии на видео игри. Тинејџерите сакаат да гледаат стриминг на неговите видеа кои го прикажуваат како игра видео игри.

„Промената во интересот беше потврдена минатата пролет кога Adweek објави дека индустријата за игри има приходи од 139 милијарди долари годишно и ги надмина Националната фудбалска лига (НФЛ), Националната кошаркарска асоцијација на САД и Канада (НБА), Бејзбол лигата (МЛБ) и Национална хокеарска лига (НХЛ) заедно.

„Заради ограничувањата од изминатата година до декември 2020 година, се забележува дека индустријата добила уште повеќе“, пишува Монахан. Глобалната гејминг индустрија се очекува да заработи 180 милијарди долари за 2020 година или зголемување на приходите за 20%, што е повеќе од спортската и филмската индустрија ширум светот.

Долгоочекуваниот настан на годината беше објавувањето на Cyberpunk 2077. Со Киану Ривс и авангарден саундтрак со песни од Grimes, Sophie и A$AP Rocky, СФ играта беше создадена со буџет од неверојатни 317 милиони долари. Видео игрите сега се приближуваат импресивно близу до најголемите буџети за холивудски продукции. (За споредба, најскапиот филм некогаш направен е „Аватар“ во 2009 година, вреден 478 милиони долари.)

Cyberpunk 2077

Во музиката и модата, компаниите ги зедоа предвид фактите и започнаа да произведуваат производи инспирирани од естетскиот екосистем на видео игрите. Во модниот бизнис, Balenciaga ја лансира својата нова колекција есен 2021 година, а рекламирањето за тоа се одвива преку видео игра, ре-креирана од модната марка. Се вика Afterworld: The Age of Tomorrow и им овозможува на потрошувачите да истражуваат различни продавници, а ликовите во него се облечени во најновата колекција на брендот.

Како и самите видео игри, естетиката позајмува многу од научната фантастика и фантазијата. Покрај тоа, компанијата сега нуди сопствени чевли кои се изработени од материјал што имитира оклоп и личи на ликовите во голем број видео игри.

На музичкиот фронт, американскиот рапер Тревис Скот и Лил Нас Х изведоа блокбастер изведби на саундтракот на видео игрите Fortnite, односно Roblox. Над 12,3 милиони играчи на Fortnite истовремено го следеа преносот во живо на Скот за време на виртуелната изведба на неговата песна Astronomical, рекорд на сите времиња, според Epic Games. Видеото за песната е снимка од самата игра. Монахан пишува дека ова е скоро двојна публика во споредба со MTV Video Music Awards во 2020 година.

Ние сме среде културни промени, продолжува коментаторот. Во истражувањето на „Whistle“, 68% од мажите на „Генерација Z“ велат дека игрите се важен дел од нивниот идентитет, 91% велат дека редовно играат видео игри, а 74% велат дека видео игрите им помагаат да останат поврзани со своите пријатели.

„Колку и да е срамно за многу луѓе, ако музиката беше најважната форма на младинска култура во 20 век, тогаш видео игрите се чини дека се најважни за 21 век“, заклучи Монахан.

Поврзани вести

3 држави кои ќе бидат шампиони во економски раст

Влатко Зорба

Електрични возила: клучна алка за почист транспорт?

Влатко Зорба

Започна ценовната војна на Саудиска Арабија и Русија

Stefanija Kuzmanovska